വില്ലൻ ചുമ കേസുകൾ ഉയരുന്നു; ആരോഗ്യ വകുപ്പ് മുന്നറിയിപ്പ് നൽകി

അയർലണ്ടിൽ വില്ലൻ ചുമയുടെ കേസുകളിൽ ഇടക്കാലത്ത് വർദ്ധനവ് രേഖപ്പെടുത്തുന്നതായി ആരോഗ്യ വകുപ്പ് മുന്നറിയിപ്പ് നൽകി. 2024ൽ ഇതുവരെ 514 കേസുകൾ റിപ്പോർട്ട് ചെയ്യപ്പെട്ടിട്ടുണ്ട്, ഇതിൽ 153 പേർക്ക് ആശുപത്രി ചികിത്സ ആവശ്യമായി വന്നു. ആകെയുള്ള പുതിയ കണക്കുകൾ ഹെൽത്ത് പ്രൊട്ടക്ഷൻ സർവൈലൻസ് സെന്റർ (എച്ച്‌പി‌എസ്‌സി) പുറത്തുവിട്ടതാണ്.

തുമ്മൽ, മൂക്കൊലിപ്പ്, പനി, നേരിയ ചുമ തുടങ്ങിയ ചെറിയ ജലദോഷം പോലെയുള്ള ലക്ഷണങ്ങളോടെ തുടക്കമാവുന്ന വില്ലൻ ചുമ, രണ്ടാഴ്ചയ്ക്കുള്ളിൽ ഗുരുതരമായി മാറും. തുടർന്ന് രോഗികൾക്ക് ശക്തമായ ചുമ, ശ്വാസംമുട്ടൽ എന്നിവ അനുഭവപ്പെടാൻ തുടങ്ങും. ശ്വാസകോശവും തലച്ചോറും ഉൾപ്പെടെ ശരീരത്തിലെ വിവിധ ഭാഗങ്ങളെ ഈ രോഗം ബാധിക്കാനിടയുണ്ടെന്ന് ആരോഗ്യ വിദഗ്ദ്ധർ മുന്നറിയിപ്പ് നൽകി.

പക്ഷാഘാതവും മറ്റു ഗുരുതര പ്രശ്‌നങ്ങളും ഒഴിവാക്കാൻ രോഗലക്ഷണങ്ങൾ കണ്ടുതുടങ്ങിയാലുടൻ ചികിത്സ തേടേണ്ടതാണെന്ന് ആരോഗ്യ വകുപ്പ് വ്യക്തമാക്കുന്നു.