അയർലണ്ടിൽ കത്തോലിക്ക കോൺഗ്രസ്‌ ഗ്ലോബൽ യൂത്ത് കൗൺസിൽ രൂപീകരിച്ചു

അയർലണ്ടിലെ കത്തോലിക്ക യുവജനങ്ങളുടെ ആത്മീയ, സാമൂഹിക, സാംസ്കാരിക വളർച്ച ലക്ഷ്യമാക്കി പ്രവർത്തിക്കുന്ന കത്തോലിക്ക കോൺഗ്രസ്‌ ഗ്ലോബൽ യൂത്ത് കൗൺസിൽ അയർലണ്ട് ദേശീയ കമ്മിറ്റി ഫെബ്രുവരി 22-ാം തീയതി ശനിയാഴ്ച വൈകിട്ട് (അയർലണ്ട് സമയം 4:00 pm) ഔദ്യോഗികമായി രൂപീകരിച്ചു. കേരളത്തിൽ നിന്ന് ജോലിക്കായും പഠനത്തിനായും എത്തുന്ന യുവജനങ്ങൾക്ക് സഹായഹസ്തമായി പ്രവർത്തിക്കുന്നതിനൊപ്പം, വിവിധ പരിപാടികൾ സംഘടിപ്പിക്കുകയും ചെയ്യുമെന്ന് കൗൺസിൽ വ്യക്തമാക്കി.ഗ്ലോബൽ നെറ്റ്‌വർക്ക് രൂപീകരണത്തിന്റെ ഭാഗമായി കത്തോലിക്ക കോൺഗ്രസ്‌ ഗ്ലോബൽ സമിതിയുടെ നേതൃത്വത്തിൽ എല്ലാ രാജ്യങ്ങളിലുമുള്ള സമുദായ അംഗങ്ങളെ കോർത്തിണക്കുന്നതിനായാണ് യൂത്ത് കൗൺസിൽ രൂപീകരിച്ചത്.

കത്തോലിക്ക കോൺഗ്രസ്‌ ഗ്ലോബൽ പ്രസിഡന്റ്‌ പ്രൊഫ. രാജീവ് കൊച്ചുപറമ്പിൽ യോഗത്തിന് അധ്യക്ഷനായതോടെ, കൗൺസിലിന്റെ ഔദ്യോഗിക പ്രഖ്യാപനം നടന്നു. ഗ്ലോബൽ ഡയറക്ടർ റവ. ഫാ. ഫിലിപ്പ് കവിയിൽ ഓൺലൈനിലൂടെ ഉദ്ഘാടനം നിർവഹിച്ചു. കൂടാതെ, ഗ്ലോബൽ ജനറൽ സെക്രട്ടറി ഡോ. ജോസുകുട്ടി ഒഴുകയിൽ, ഗ്ലോബൽ യൂത്ത് കൗൺസിൽ ജനറൽ കോർഡിനേറ്റർ സിജോ ഇലന്തൂർ, ഗ്ലോബൽ വൈസ് പ്രസിഡന്റ്‌ ബെന്നി ആന്റണി, യൂത്ത് കൗൺസിൽ ഗ്ലോബൽ കോർഡിനേറ്റർമാരായ ലിയോൺ ജോസ് വിതയത്തിൽ, ജസ്റ്റിൻ ജോസ് നടക്കലാൻ എന്നിവർ സംസാരിച്ചു.

കൗൺസിലിന്റെ ഭാവി പ്രവർത്തനങ്ങളെക്കുറിച്ചുള്ള പൊതുചർച്ചയ്ക്കുശേഷം അയർലണ്ട് യൂത്ത് കൗൺസിൽ ജനറൽ കോർഡിനേറ്ററായി ജോജസ്റ്റ് സി. മാത്യു, ജനറൽ സെക്രട്ടറിയായി സാൻജോ മുളവരിക്കൽ, ജോയിന്റ് ജനറൽ കോർഡിനേറ്ററായി ഡെനിഷ് ദേവസ്യ എന്നിവരെ തിരഞ്ഞെടുത്തു.

യോഗത്തിൽ ഗ്ലോബൽ യൂത്ത് കൗൺസിൽ കോർഡിനേറ്റർമാരായ ഷിജോ ഇടയാടിൽ, അബി മാത്യൂസ്, ജർമ്മൻ ജനറൽ കോർഡിനേറ്റർ ജോമേഷ് കൈതമന, ജോർജുകുട്ടി, ഗ്ലോറിയ എന്നിവർ പങ്കെടുത്തു.